Ձեր վստահելի աղբյուրը

Ադրբեջանի հատուկ ծառայությունները, իրենց արտասահմանյան փորձագետների խորհրդով, երկրի ղեկավարության առջև հարց են բարձրացրել Սիրիա մեկնող զինյալների հարցում նոր մարտավարություն ընդունելու շուրջ, հաղորդում է ադրբեջանական Minval.az տեղեկատվական պորտալը:

Ինչպես նշված է նյութում, ադրբեջանական «Ենի Մուսավաթ» թերթին հավաստի աղբյուրը հայտնել է՝ եթե ավելի վաղ խոչընդոտներ էին ստեղծվում վահաբականների ու նրանց հետևորդների՝ թուրքական տարածքով դեպի Սիրիա ու «ջիհադի» այլ երկրներ մեկնելու ճանապարհին, ապա այժմ չեն միջամտում գործընթացին՝ անգամ մեկնողների մասին օպերատիվ տվյալներ ունենալու դեպքում:

Այդուհանդերձ, փորձագետը, որին դիմել էր Minval.az-ը, նկատել է՝ պոտենցիալ սպառնալիքի կրող զանգվածին երկրից դուրս գալ թույլատրելու մարտավարությունը ևս վտանգավոր է ու թյուր: Նրա խոսքերով՝ իրենք տեղեկություններ են ստացել, որ «Իսլամական պետություն» իսլամիստական խմբավորումն ինքն է ցանկանում շուտով ընդհատակ անցնել և այդպես գործել:

Minval.az-ը նաև տեղեկացնում է, որ վերջին 3 տարվա ընթացքում Ադրբեջանի քաղաքացիները Նախիջևանի ու Վրաստանի տարածքով հասնում էին Թուրքիա, ապա անարգել անցնում թուրք-սիրիական սահմանը՝ ջիհադականներին միանալով: Կար մեկ այլ երթուղի ևս՝ ՌԴ-ի տարածքով, որտեղից էլ ադրբեջանցիներն ինքնաթիռների օգնությամբ հասնում էին Թուրքիա, ապա անցնում Սիրիա: Սակայն, հաշվի առնելով, որ Թուրքիայի տարածքով Սիրիա ներթափանցելը ներկայումս ավելի բարդ է դարձել, ըստ աղբյուրի, ադրբեջանցիներին առաջարկել են այլ երթուղի՝ Իրանի տարածքով դեպի Պակիստան, որտեղ ադրբեջանցի զինյալներն «իրենց սեփական նյութական միջոցներով գնում են ինքնաձիգեր ու փամփուշտներ»:

Հատկանշական է, որ անվտանգության համակարգի նախկին սպա, ադրբեջանական «Թրենդ» տեղեկատվական գործակալության տնօրենի տեղակալ Արզու Նագիևը հաստատել է ադրբեջանցի զինյալների տեղաշարժի ուղիների մասին տեղեկացված լինելու փաստը: «Կան սպանվածներ, կան նույնիսկ հայտնի Գաունտանամոյի կալանավայրում պատիժ կրողներ»,-ասել է նա:

Կայքը հիշեցնում է, որ անցած շաբաթ Ադրբեջանի Կրոնական կառույցների հետ աշխատանքի պետական հանձնաժողովի նախագահ Մուբարիզ Ղուրբանլըն հայտնել է, թե չեզոքացնելու են արմատական կրոնական խմբավորումների նյութական աղբյուրները՝ հավելելով, որ այդ ուղղությամբ համապատասխան աշխատանքներ են տանում:

Հիշեցնենք, որ ադրբեջանցի սալաֆիականները կամ վահաբականներն առաջին տարին չէ, որ մարտնչում են Սիրիայում, Աֆղանստանում ու Պակիստանում տարբեր ահաբեկչական խմբավորումների կազմում: Ադրբեջանական Vesti.az տեղեկատվական գործակալությունը գրում է, որ նշված երկրներում ադրբեջանցի ահաբեկիչների թիվը մոտ 300 է, իսկ ահա ադրբեջանական Faktxeber պորտալը հայտնում է՝ Սիրիայում վերջին 3 տարիներին սպանվել են շուրջ 200 ադրբեջանցի ահաբեկիչներ: ԶԼՄՙ-ները բազմիցս տեղեկացրել են նաև ահաբեկիչների ադրբեջանցի հրամանատարների չեզոքացման մասին:

Հավելենք նաև, որ Ադրբեջանի և միջազգային ահաբեկչական խմբավորումների առնչությունները սկիզբ են առել դեռևս 1990-ականներին՝ Արցախյան պատերազմի տարիներին: Այդ ժամանակ էլ Հեյդար Ալիևի գլխավորությամբ երկրի ղեկավարությունն Արցախի հայ բնակչության դեմ պատերազմում դիմել է Աֆղանստանից, Թուրքիայից, Չեչնիայից իսլամիստական խմբավորումների օգնությանը: Այս խմբավորումների անդամ ահաբեկիչներին հաջողվել է անհրաժեշտ կապեր հաստատել Ադրբեջանում՝ սկսելով Ադրբեջանի քաղաքացիների հավաքագրումը, որոնց ուղարկում էին կռվելու Աֆղանստան ու Հյուսիսային Կովկաս: Այստեղ նրանք մարտնչում էին միջազգային կոալիցիոն ուժերի ու ռուսական կառույցների դեմ: Վերջին տարիներին Ադրբեջանի քաղաքացիներն ակտիվորեն մասնակցում են ՌԴ-ում, Աֆղանստանում, Սիրիայում և Իրաքում ծայրահեղական խմբավորումների վարած մարտերին: